Les i lokalavisa, Firdaposten, s 22 lørdag 20.03. ”Slutt på bompengar mellom Førde og Florø”. Gratulerer alle, dette har vi alle fortent, og fått til gjennom målretta politisk arbeid og økonomiske bidrag frå brukarane!

Rett under kjem ei kunngjering frå Flora kommune, administrasjonen, som varslar dei kommunale ruteinnskrenkingane i Florabassenget.

For meg er dette ein talande symbolikk; dagen ein kan reise fritt mellom tvillingbyane Flora-Førde, er dagen ein varslar at ein tek vekk deler av vegen (les; kuttar båtruter) frå ein stor del av kommunen sine innbyggarar.

Klappsalvene hadde knapt stilna i bystyresalen etter presentasjonen av ”Ruteplanen 2005-09” før det synte seg at politikarane våre alt hadde gløymt den. I Ruteplanen heiter det mellom anna; Kommuneplanen legg føringar for arealbruk, leier og viktige ledd i kommunikasjonssystemet. I denne planen er det mellom anna eit mål å byggja opp under og styrke lokale sentra i distriktet gjennom ein aktiv politikk i og omkring hovudrutestoppa. Desse er Sunde på Askrova, Svanøybukt på Svanøy, Fanøya, Skorpevågen på Skorpa, Rognaldsvåg på Rekstad, Barekstad på Hovden/Barekstad, osv.

Som vi veit har tida etterpå vært ein einaste stor fest, og vi har som kommune stort sett unna oss det vi har hatt lyst på. I dette ”spleiselaget” har vi alle bidratt gjennom skatteseddelen vår, og vi har alle ei ”gjeld” på om lag 100’ som kommunen forvalter. No finn nokon brått ut, at ”satsinga på lokalsenter” er best om ein trekk all kommunal aktivitet ut frå bygdene, og utøver ein hard sentraliseringspolitikk gjennom rutekutt, og lar administrasjonen stå for den. Eventuelle konsekvensanalyser vert droppa, då vert innsparinga størst.
Dei fine trådane i samfunnsveven vår som rutetilbodet utgjer toler ikkje denne belastningen, og byrjar slitne. Det er tilgangen til vårt felles sentrum som no blir hardast råka, og vi ser gjennom prosessen, at dette skjer utan at politikarane våre står fram og tek ansvar. Dette kjennest først og fremst som eit svik mot innbyggarane, men må og være leit for administrasjonen som berre følger opp politiske vedtak.
Det vert ofte trekt fram at vi no har ein rådmann med bakgrunn frå forsvaret. Etter det eg er fortalt var han underoffiser der. Vi veit frå historia at nokre av verdas mektiske hærar var mektige i kraft av dugleiken til sine underoffiserar. Men ein underoffiser er ingen general! Kvar er generalane våre (les; politikarane) i denne prosessen? Det er vel ikkje slik i Flora at det er administrasjonen som skal utforme politikk? Var det egentlig meininga med samanslåinga i –64, at alle verdier vi skaper skal nyttast i sentrum, og kommunikasjonen til bygdene avviklast? Eller ser ein no eit potensiale i å utvikle bykommunen Flora?
Takk til Flora arbeidarlag som no har tilbydd seg å stå i spissen for eit arbeide som er ment å motvirke den negative utviklinga vi no ser. Dere er dei einaste ”utanfrå” som har tilbydd ei hjelpande hand. Dei ”styrande” ventar vi ikkje å høyre meir frå før nærmare kommunevalget.